FJÖR FRÁ UPPHAFI TIL ENDA
	Í fjölda ára hefur Björgunarsveitin Ársæll haft undir sínum verndarvæng öflugt unglingastarf. Bæði undir nafni Björgunarsveitar Alberts og Björgunarsveitar Ingólfs. Fólk getur sótt um inngöngu í unglingadeildina við 15 ára aldur og fær á næstu árum tækifæri til að fá nasasjón af starfi björgunarsveita. Þegar fólk hefur svo náð 17 ára aldri getur það sótt um að gerast nýliðar í sveitinni. Þá hefur fólkið sem starfað hefur í unglingadeild góðan grunn, sem auðvelt er að byggja ofan á.
Unglingastarfið er margþætt, haldnar eru kynningar á ýmsu í starfi sveitarinnar, farið í ferðir, heimsóknir til annarra unglingadeilda, tekið þátt í flugeldasölu sveitarinnar og farið á landsmót unglingadeilda Slysavarnafélagsins Landsbjargar sem haldin eru á tveggja ára fresti.
	Flestir sem tekið hafa þátt í slíku starfi eru sammála um hversu skemmtilegt og fræðandi það er. Kosturinn við björgunarsveitina er að hún fær til starfa ungt og skemmtilegt fólk sem tilbúið er að gera björgunarstörf að áhugamáli og lífsstíl.

Kynningarfundur verður haldinn miðvikudaginn 8. september í Gaujabúð Suðurströnd, Seltjarnarnesi kl. 19:00.

Unglingar fædd 1994-1996 velkomin.  

Nánari upplýsingar um unglingastarfið er hægt að fá í gegnum netfangið unglingadeild(hjá)bjorgunarsveit.is