Sex félagar úr bílahóp Björgunarsveitarinnar Ársæls fóru á föstudagskvöld í jeppaferð á 2 bílum. Á föstudagskvöldið keyrðum við í Jökulheima og gistum þar í skála JÖRFÍ. Það voru þarna 4 aðrir bílar á sama ferðalagi og við þannig að það var ákveðið að vera samferða á laugardeginum. Farið var af stað um kl 8 á laugardagsmorgun og fannst hentug leið yfir Tungnaá og var jökullinn mjög greiðfær. Við vorum komin á Grímsfjall korter yfir 10. Skyggnið var búið að vera misgott þannig að það var ákveðið að moka okkur inn í skálana sem eru líka í eigu JÖRFÍ, fá okkur nesti og sjá svo til. Eftir að allir voru búnir að borða hafði veðrið lagast og var þá ákveðið að fara í bíltúr að skoða Grímsvötn og síðan Þórðarhyrnu. Skyggni hélt áfram að koma og fara en allt gekk vel enda gott færi á jöklinum. Við vorum komin til baka seinnipart dags að slappa af í skálanum og síðan tók við eðal grillveisla þar sem Siggi grillaði lamb ofan í snjóhúsi. Það var orðið leiðindar skafrenningur um nóttina og morguninn eftir var ennþá alveg blint þannig að það var brunað niður jökulinn og tekin smá hringur í Veiðivötn í heimleiðinni.